ރަމަޟާން މަހުގެ ތެރޭގައި އަންނަ އެންމެ މުހިންމު އެއް ދުވަހެއްގެ ގޮތުގައި ބަދުރު ހަނގުރާމައިގެ ދުވަސް ފާހަގަކުރެވެއެވެ. އިސްލާމްދީނަށް ލިބުނު އުފާވެރި ނަސްރެއްގެ ގޮތުގައި މިދުވަސް އަޅުގަނޑުމެން ހަނދާން ކުރަމެވެ.
މިއަހަރުގެ ރޯދަމަހުގެ ބަދުރު ދުވަހާ ގުޅިގެން އަޅުގަނޑުގެ ހިތުގައި ވަރަށް ގިނަ އިހުސާސްތަކެއް އުފެދެއެވެ. ރަމަޟާން މަސް ފެށުނީއްސުރެ ނިމެންދެން، އަޅުގަނޑުގެ ގޭގައި އިސްލާމީ މަޢުލޫމާތު ހިމެނޭ ކުޑަ ވާދަވެރި ސުވާލު މުބާރާތެއް ބާއްވަމެވެ. ޚާއްޞަކޮށް ބަދުރު ދުވަހު ކުރެވޭ ސުވާލުތަކަކީ ބަދުރު ހަނގުރާމައާ ގުޅުންހުރި ސުވާލުތަކެވެ.
މި ދުވަހަކީ އަޅުގަނޑަށް އިތުރު މުހިންމުކަމެއް ލިބިފައިވާ ދުވަހެކެވެ. އެއީ އަޅުގަނޑުގެ ބައްޕަ އުމްރާގައި ވަނިކޮށް އަވަހާރަވީ ބަދުރު ދުވަހުގައެވެ. އޭގެފަހުން، އަޅުގަނޑަށް ސާފުކޮށް ވިސްނިފައިނެތް ނަމަވެސް، އަޅުގަނޑުގެ ދިރިއުޅުމަށް ވަރަށް ބޮޑެތި ބަދަލުތަކެއް އައެވެ. ޢާއިލާގެ އެންމެން އެއްބަސްވެ، ގޭގެ އެންމެހައި ކަންކަން ބެލެހެއްޓުން އަޅުގަނޑާ ހަވާލުކުރެވުނެވެ.
އެދުވަހުން ފެށިގެން މިއަދާ ހަމައަށްވެސް، އަޅުގަނޑަކީ ޢާއިލާގެ ބަލަދުވެރިޔާގެ ގޮތުގައި ހުރެ، ގޭގެ ކަންކަން ބަލަހައްޓަމުންދާ މީހެކެވެ. އުފާވެރިކަމާއި، ކަންބޮޑުވުމާއި، ހިތްދަތިކަން ލިބޭ ވަގުތުތައްވެސް އާދެއެވެ. ނަމަވެސް އަޅުގަނޑުގެ ޒިންމާ އަދާކުރުމުގައި ސާބިތު ކަމާއެކު ދެމިހުރުމަށް ފަހެއްނުޖެހެމެވެ.
މިއަހަރުގެ ބަދުރު ދުވަހަކީ، އަޅުގަނޑުގެ ދަރިފުޅުގެ އުފަންދުވަސްވެސް މެއެވެ. އަދި އިތުރު ބަދަލެއްގެ ގޮތުން، އަޅުގަނޑަށް ލިބެމުންއައި އާމްދަނީއެއް މިއަދު ހުއްޓުމަކަށް އައިސްފައިވެއެވެ. މިހެންވުމުން، މިހާރަށްވުރެ ބުރަކޮށް މަސައްކަތްކޮށް، އިތުރު މަސައްކަތްތަކެއް ފެށުމުގެ މުހިންމުކަން ވަރަށް ބޮޑަށް ވިސްނި އެކަމާއިގެން ކުރިއަށް ދުއުމުގެ ފޯރިއާއި ހިތްވަރު މާގަދަ ވެއްޖެއެވެ.
އަޅުގަނޑުގެ ހަޔާތުގައި މިހުރިހާކަމެއް އެއްދުވަހަކަށް އިއްތިފާގު ވާތީ، ބަދުރު ހަނގުރާމައިން ދިރިއުޅުމުގެ ތެރެއަށް ގެންނަން ޖެހޭ މުހިންމު ދަސްތަކެއް ހުރިކަމަށް އަޅުގަނޑަށް ޤަބޫލުކުރެވެއެވެ. މިގޮތުން 5 މުހިންމު ނުކުތާއެއް، އަޅުގަނޑު ފާހަގަކޮށްލާނަމެވެ.
އެންމެ ފުރަތަމަ ކަމަކީ، އަޅުގަނޑުމެން އަބަދުވެސް ﷲ ސުބުޙާނަހޫ ވަތަޢާލާ ހަނދާންކުރަން ޖެހެއެވެ. ކޮންމެ ކާމިޔާބެއްވެސް ލިބެނީ ﷲ ގެ ރަޙްމަތްފުޅުންނެވެ. އަޅުގަނޑުމެން ވާންވާނީ ހިތްތިރި، ޝުކުރުވެރިވާ ބަޔަކަށެވެ.
ދެވަނަ ކަމަކީ، ކޮންމެ ކަމެއްގައިވެސް މަޝްވަރާކުރުމަކީ ކީރިތި ރަސޫލާގެ ސުންނަތެކެވެ. އެއްވެސް ނިންމުމެއް ނިންމުމުގެ ކުރިން އިޚްލާޞްތެރި ލަފާ ހޯދުމަކީ މުހިންމު ކަމެކެވެ.
ތިންވަނަ ކަމަކީ، ﷲ ގެ ތަޤްދީރުފުޅަށް އަޅުގަނޑުމެން އިތުބާރުކުރަން ޖެހެއެވެ. ދަތި އުނދަގޫ ވަގުތުތަކުގައި ހިތްވަރު ގެއްލިދާނެއެވެ. ނަމަވެސް ބަދުރުގައި މުސްލިމުންނަށް ކާމިޔާބު ލިބުނީ އެބޭކަލުންގެ އުއްމީދާއި އިތުބާރު ގެއްލިނުދީ ތިބުމުންނެވެ.
ހަތަރުވަނަ ކަމަކީ، ކާމިޔާބު ލިބެނީ މާއްދީ ވަސީލަތްތަކުން އެކަންޏެއް ނޫނެވެ. އެކުވެރިކަމާއި، އެއްބައިވަންތަކަމާއި، ސާބިތުކަމާއެކު ކުރެވޭ މަސައްކަތުންނެވެ. ބަދުރުގައި މުސްލިމުންނަށް ކާމިޔާބު ލިބުނީ މުހާޖިރުންނާއި އަންސާރުންގެ އެއްބައިވަންތަކަމުންނެވެ.
ފަހުކަމެއް ގޮތުގައި އަޅުގަނޑުމެންނަށް ލިބޭ ކޮންމެ ކާމިޔާބެއްގެ އަސްލަކީ މާތްﷲ ގެ ދަރުމައެވެ. އަޅުގަނޑުމެން ކިތަންމެ މަސައްކަތެއް ކުރިކަމުގައި ވިޔަސް، އަޅުގަނޑުމެންގެ ކާމިޔާބު ބިނާވެގެންވަނީ އަޅުގަނޑުމެން އަދާކުރާ ނަމާދުތަކާއި، ދުޢާތަކާއި އަދި މާތްﷲ އަށް އޮންނަ އީމާންކަމުގެ މައްޗަށެވެ.
ބަދުރު ހަނގުރާމައިގެ ވާހަކަައަކީ ހަމައެކަނި ފޮތްތަކުގައި ލިޔެވިފައިވާ ތާރީޚީ ހާދިސާތަކެއްގެ ގޮތުގައި ދޫކޮށްނުލާށެވެ. އޭގެ ބަދަލުގައި، އެއީ އަޅުގަނޑުމެންގެ މަގު ތަނަވަސްކޮށްދޭ އަލިމަގެއްގެ ގޮތުގައި ދެކިގެން ކުރިއަށް ދަމާހިންގަވާށެވެ. ރަސޫލާ ﷺ ގެ ކޮންމެ ޢަމަލަކީވެސް އަޅުގަނޑުމެންނަށް މަގުދައްކައިދޭ ނަމޫނާއެއްކަމުގައި ބަލައި، އެ ޢަމަލުތައް އަޅުގަނޑުމެންގެ ދިރިއުޅުމުގައި ސާބިތު ކުރުމަށް މަސައްކަތްކުރަންވީއެވެ.
އަޅުގަނޑުމެންނާ ކުރިމަތިވާ ކޮންމެ ދަތި އުނދަގޫ ވަގުތެއްގައި، ކާމިޔާބީގެ ވަގުތުތަކުގައި، އަދި ޝައްކު އުފެދޭ ހާލަތްތަކުގައިވެސް ބަދުރުން ލިބެން ހުރި އެތައް ހިތްވަރަކާއި ފިލާވަޅު އެބަހުއްޓެވެ. މިއަދާ ހަމައަށްވެސް ބަދުރުގެ ކާމިޔާބީގެ ވާހަކަތައް ދެމިގެން އައިސްފައިވަނީ އެ ހަނގުރާމައިން ލިބެންހުރި ގިނަގުނަ ޢިބްރަތްތަކާއި ފިލާވަޅުތަކުގެ ސަބަބުންނެވެ. މިހާރުގެ ޖީލާއި އަދި އަންނަން އޮތް ޖީލުތަކުގެ ޒިންމާއަކީ ބަދުރުން ލިބެންހުރި ފިލާވަޅުތަކަށް ސަމާލުވެ، އެ ފިލާވަޅުތައް ދިރިއުޅުމުގެ އެކި ދާއިރާތަކުގައި ބޭނުންކުރުމެވެ.