EN
އަޅުގަނޑުމެންގެ މުޖްތަމައުގައި މިސްކިތް ފަރުމާކުރަނީ ހަމަ އެކަނި ނަމާދު އަޅުކަން ފުރިހަމަ ކުރެވޭނެ ފަސޭގޮތަށް ވިސްނާގެންނެވެ. ޒަމާނާއަށް އައި ބަދަލާއެކު، މިސްކިތަކުގެ ޑިޒައިންއަށް މިވަނީ ވަރަށް ބޮޑެތި ބަދަލު އައިސްފައެވެ. ނަމަވެސް އަސާސީ ވިސްނުން ހުރީ ކުރިންވެސް އަޅުގަނޑުމެންގެ ވިސްނުން ހުރިގޮތަށެވެ.
ދާދިފަހުން ޒިކުރާގެ މިސްކިތް އަލުން ބިނާ ކުރަންވެގެން، އެމިސްކިތުގެ ކުރެހުން އާންމު ކުރިއެވެ. މިސްކިތުގެ އެތެރޭގެ ކުރެހުންތަށް އާންމު ނުކުރާތީ އެތެރެ ހުރިގޮތެއްް ނޭގެއެވެ.
ނިއުޔޯކުގައި ބިނާ ކުރާ އިސްލާމިކް ސެންޓަރެއް ހުންނާނެ ގޮތުގެ ވީޑިއޯއެއް އަޅުގަނޑަށް ބަލާލެވުނެވެ. އަޅުގަނޑަށް ފާހަގަ ކުރެވުނީ އެމަރުކަޒުގެ ފެސިލިޓީތައް އަމާޒު ކުރެވިފައި ހުރީ ފުރާވަރާއި ޅަޒުވާނުންގެ ސަމާލުކަން ހޯދޭގޮތަށް ކަމެވެ. އެެހެންކަމުން އަޅުގަނޑުގެ ހިތަށް އެރީ ރާއްޖޭގައި މިސްކިއްތަށް ބިނާ ކުރާއިރު މިފަދަ ވިސްނުމެއް ނުގެންގުޅެނީ ކީއްވެބާއެވެ.
އަޅުގަނޑަކީ ކޮންމެވެސް ވަރަކަށް ޒިކުރާ މިސްކިތަށް ނަމާދަށް އަރާ އުޅޭ މީހަކީމެވެ. އަޅުގަނޑަށް ޒިކުރާ މިސްކިތުން ފުރާވަރުގެ ޒުވާނުންނާއި ޒުވާނުން ފެންނަނީ ނިސްބަތުން މަދުންނެވެ. އަދި ފަތިސް ނަމާދުގައި ނަމާދަށް އަރާ ޒުވާނުން ނެތޭ ބުނުންވެސް ދޮގަކަށް ނުވާނެއެވެ. ފަތިސް ނަމާދުގައި ޒިކުރާ މިސްކިތުގައި ހަމަވާނީ ގާތްގަޑަކަށް ހަތަރު ސަފެވެ. ދެން ބަލަމާ ހިންގާ، ދެ ސަފަކީ ބިދޭސީންނެވެ.
އަޅުކަމަށް ޒުވާނުން އަހުލުވެރި ކުރަން ޖެހޭކަމަށް ދީނުގައިވެސް އޮވެއެވެ. މައިންބަފައިން މައްޗަށް ދަރީން ލައްވާ އަޅުކަން ކުރުމަކީ ދީނުގައި ވަރަށް ބޮޑަށް ބާރު އަޅާފައިވާ ކަމެކެވެ. މިއަހަރުގެ އޭޕްރީލު 19 ވަނަ ދުވަހު ހުކުރު ހުތުބާ އޮތީ، ދަރީން ލައްވާ ނަމާދު ކުރުމަށް ބާރު އެޅުމާއި ގުޅޭގޮތުންނެވެ. ހުތުބާގައި ނަމާދުގެ މުހިންމުކަމުގެ މައްޗަށްވަނީ ވަރަށް ރަނގަޅަށް އަލި އަޅުވާލާފައެވެ. އަދި މައިން ބަފައިން ކަންކުރަންވީ ގޮތުގެ އިރުޝަދުވެސް ވަނީ ދީފައެވެ.
އަޅުގަނޑަށް ފެންނަތަނުން، އަޅުގަނޑުވެސް ހިމެނޭގޮތަށް ދަރިން ލައްވާ އަޅުކަން ކުރުވަން މަސައްކަތް ނުކުރެވޭކަން، މިސްކިތަށް އަރާ އާބީދީން ސާބިތުވެއެވެ.
މައިންބަފައިންގެ މައްޗަށް މިއޮތް ބޮޑު ޒިންމާ، އަދާ ކުރުމަށް ދައުލަތުން ބައެއް ކަންކަން މަގުފަހި ކޮށްދޭން ބޭނުންވެއެވެ.
ހުތުބާގައި ދަރިންނަށް އަނިޔާ ނުވާގޮތަށް ޖަހައިގެންވެސް ނަމާދުކުރުވުމަށް ބާރު އަޅާފައިވެއެވެ. އަޅުގަނޑުމެންގެ ގަވާއިދުތައް ހެދިފައިހުރީ މިފަދަ ކަންކަން ކުރެވޭ ގޮތަކަށެއް ނޫނެވެ. އަަޅުގަނޑުގެ ރައްޓެއްސެއްގެ ދަރިއެއް އިމްތިހާން ކައިރިވެގެން ޓީވީ ގަޑިތައް މަދު ކުރީމައި އެނާއަށް ސުކޫލުން ދީފައި އޮތް ނަންބަރަކަށް ގުޅިއެވެ. އަދި ހުށަހެޅި ޝަކުވާއަށް ދައުލަތުގެ މުއްސަސާއިން ވަޤުތުން ބެލެނިވެރިޔާއާ ސުވާލުކުރިއެވެ.
ބެލެނިވެރިޔާއާ ސުވާލު ކުރުމުން މައްސަލައެްނެތެވެ. ކުޑަކުދިންނަށް ރައްކާތެރިކަން އޮންނަ ސިޔާސަތާއި ޤަވާދިތައްވެސް ހުންނަންޖެހެއެވެ.
އެކަމަކު، ނަމާދު ނުކޮށްގެންނޭ ކިޔާ ބެލެނެވެރިޔާ އަތް އުފުލާފިނަމަ، އެކަމުގެ ޝަކުވާއިން ބެލެނިވެރިޔާ ސަލާމަތްވެވިދާނެތޯއެވެ. މިހެންވަނީ މިފަދަ ސިޔާސަތު ހަދާއިރު ހުރިހާ ނަޒަރަކުން ކަޅިހިންގާފައި ނެތީމައެވެ.
ދެން އޮތީ މިސްކިތްތަށް ފަރުމާކުރުމާއި ދަރިން އެތަނަށް އަހުލުވެރި ކުރުމެވެ. މިސްކިތްތަށް މިހުންނަނީ ހެދުނުން ފެށިގެން މެންދުރު ނަމާދާއި ޖެހެންދެން ހުސްކޮށެވެ. އަޅުގަނޑުމެންގެ ތުއްތުކުދީން ޤުރުއާން ކިޔަވަން ގެންދާ ކުލާސްތަށް ހިންގަން، މިސްކިތްތަށް ހުޅުވާލަން ވީނުންތޯއެވެ. ބޮޑެތި މިސްކިއްތަކުގައި ދެ ކުލާސް ތިން ކުލާސް ވެސް އެއްފަހަރާ ހިންގޭނެެއެވެ.
އަދި ހަވީރު 4 އިން 6 އަށްވެސް ގުރާން ދަސްކޮށްދޭ ކުލާސްތަށް ހިންގާ ފަރާތްތަކާއި މިސްކިތްތަކުގައި ގުރުއާން ކިޔަވާދިނުމަށް ހަވާލު ކުރަންވީނުންތޯއެވެ. އަގެއް ނެގި ނަމަވެސް މިސްކިތުގެ ކޮންމެވެސް ހަރަދުތަކެއް ސަލާމަތްވެސް ކުރެވޭނެއެވެ.
މިހެން ހެދިއްޖެ ނަމަ ތުއްތު އިރުންސުރެން ކުދިން މިސްކިތަށް ދާން އަހުލުވެރި ކުރެވޭނެއެވެ.
ޅަޒުވާނުންނަށް ކަމުދާގޮތަށް މިސްކިތް ފަރުމާ ކުރަންވެއްޖެއެވެ. މިސްކިތުން އިންޓަނެޓް ފޯރުކޮށްދޭން އެބަޖެހެއެވެ. މިސްކިތް ހުންނަ ހިސާބު ގަނޑުގެ ޒުވާނުން އެއްތަން ކުރެވޭ ތަނަކަށް މިސްކިތް ވާންވީއެވެ. ފިލާވަޅުދަސް ކުރަން ތިބެވޭގޮތާއި ބައެއް ކަހަލަ ކުޅިވަރު ކުޅެވޭނެ އިންތިޒާމް ހުރީމައި ޒުވާނުން މިސްކިތަށް ހިތް ޖެހޭނެއެވެ.
ފަތިހު ހޭލައިގެން މިސްކިތުން ނަމާދު ކޮށްލާއިގެން ބާސްކެޓް ބޯޅަ މިސްކިތު ގޮތި ތެރޭގައި އުކާލެވޭގޮތް ހުރީމައި ކޮންމެވެސް ޒުވާނުންތަކެއްގެ ޝައުގުވެރިކަން އުފެދިދާނެއެވެ.
އަޅުގަނޑުމެންގެ ޤައުމުގައި ވަރަށް ބޮޑެތި މިސްކިތްތަށް އެބަހުއްޓެވެ. މިސާލަކަށް އިސްލާމީ މަރުކަޒު ބައްލަވާލައްވާ، މިސްކިތުގެ މަތީބުރީގެ ދެފަރާތް އެހުންނަނީ އެއްހުކުރުން އަނެއް ހުކުރަށް ހުސްކޮށެވެ. އެތަނުގައި ވޯކްޝޮޕްތަށް ބާއްވަން ދޭންވީނުންތޯއެވެ. އޭރުން އެކަމަށް ހާޒިރުވާ ފަރާތްތަކުން މެންދުރު ގަޑީގައި ތިބޭނީ ނަމާދުގައެވެ.
ގޮޑި މޭޒު ނުލާ ބޭއްވޭނެ ވޯކްޝޮޕްތައްވެސް ހުންނާނެއެވެ.
