EN
މަޖްލިސް އިންތިހާބުގެ ވޯޓު ކަންތައް ނިންމާއި ގެއަށް އަޅުގަނޑަށް އާދެވުނީ ރޭގަނޑު 8 ޖެހި އިރުއެވެ. އަޅުގަނޑު ތާއީދު ކުރި ކެންޑިޑޭޓަށް އިންތިހާބު ގެއްލުނީތީ އުދާސްކަމެއް ހުއްޓެވެ. އަދި ގެއަށް ވަދެވުމުން ޚަބަރު ބަލާލިއިރު ޕާރޓިއަށްވެސް އުއްމީދު ކުރިފަދަ ނަތީޖާ ލިބޭނެ ކަމަކަށް ނުފެނެއެވެ.
އިންތިހާބުގެ ނަތީޖާ ބަލަން އިނުމަށް ވުރެ ރަނގަޅުވާނީ ކުރިން ވެސް ރޭވިފައި އޮތްގޮތަށް 'ލަސްވިޔަސް' ފިލުމު ބަލާލަން އަބިމިހާ އެކު ދިއުން ކަމަށް ވިސްނުނެވެ.
އަޅުގަނޑު އާންމުކޮށް ދިވެހި ފިލްމު ބަލައެއް ނޫޅެމެވެ. އެހެންނަމަވެސް ކޮންމެ ހެން ބަލަން ޖެހޭ ދިވެހި ފިލުމު ހުރެއެވެ. ރައްޓެސަކު ހަދާ ފިލެއްމެ ވިއްޔާ ބަލަމެވެ. ލަސްވިޔަސްއަކީ ރާއްޖޭގައި ހުރި އެންމެ ފުންނާބު އުސް ޑައިރެކްޓަރ ތައްޔާރު ކުރި ފިލްމެއްވީމާ ބަލަން ޖެހޭނެކަމަށް އަޅުގަނޑުމެން ދެމަފިރިންވެސް ޤަބޫލުކުރަމެވެ.
ލަސްވިޔަސް ފިލުމު ލިޔެ ޑައިރެކްޓުކުރީ ޓެޑުރީއެވެ. އެހެންކަމުން އަޅުގަނޑު ފިލުމު ބަލަން ޖެހޭ ނަޒަރިއްޔާތު ތައްކޮޅެއް ހަނިވެއެވެ. ކޮންމެއަކަސް ފިލުމުގެ ވާހަކަ ވަރަށް މިޒަމާނަށް ފެތެއެވެ. މިހެން މިދަންނަވަނީ މިއަދު މުޖުތަމައުގައި ދިމާވާ މައްސަލަތަކާއި ގުޅުވާފައި ވާހަކަ ލިޔެފައި އޮތީމައެވެ. މިއަދުގެ ޒުވާނުންގެ ގުޅުންތައް ހުންނަގޮތާ، ޑިޕްރެޝަނާއި ޑިޖިޓަލް ބްލެކްމެއިލު ކުރުމާ އަދި ކެންސަރ ބައްޔާއި ވަށައިގެން ވާހަކަ ވަނީ ލާމެހިފައެވެ. ޑައިލޮގު އޮތީ އާންމު ވާހަކަ ދައްކާ އުސޫލަށެވެ. އަދި ޑައިލޮގ ހުށަހެޅުމުގައި އެކްޓަރުންގެ ފަރާތުން އައުބު ކަމެއް ނުފެނެއެވެ.
ފިލްމުގެ ސިނަމެޓަގަރަފީ ސަޅިއެވެ. މަންޒަރުތަށް ހުރީ ވަރަށް ވިސްނުންތެރި ކަމާއެކު ހާލަތާއި ގުޅޭގޮތަށް ބެލުންތެރިޔާއަށް މަންޒަރު އިހްސާސް ވާގޮތަށް އަތުރާލާފައެވެ. ފިލުމު ފުރިހަމަ އުފެއްދުމަކަށް ހެދުމަށް މަސައްކަތްކޮށްފައި ހުރިކަން ފިލްމުގެ މަންޒަރުތަކުން ދޭހަވެއެވެ. ރާއްޖޭގެ ރީތި މަންޒަރުތައް ވާހަކަ ތެރޭއިން ދިޔައީ ފެންނަމުންނެވެ.
ފިލުމުގެ ކާސްޓު ބޮޑުވެފައި ތިޔާގިއެވެ. އަދި ކޮންމެ ބައިވެރިއެއްގެ ރޯލު ފެނުނީ ވަރުގަދަކޮށެވެ. އަޅުގަނޑަށް އެކްޓިން ހާއްޞަވާ ތިން ތަރިއެއް ދަންނަވާލާނަމެވެ. ފިލްމުގެ ބަތަލާ ވަޝިއްޔާގެ ބައި ފުރިހަމައެވެ. އަދި ސަޕޯޓިން އެކްޓަރ އާސިމްގެ ބައި ވަރަށް ރަނގަޅެވެ. އާސިމާއެކު ސްކްރީންނުން ފެންނަ އެހެން ކޮންމެ އެކްޓަރެއްވެސް ފަނޑުކޮށްލައެވެ. މިހެންވަނީ އަދާ ކުރާ ޝަހުސިއްޔަތު ފުރިހަމައަށް ތަމްސީލުކޮށްލެވޭތީއެވެ. އަދި ފިލްމުގެ ނުބައިބާ ރޯލު އިފުނާޒު އަދާކޮށްލާފައިވަނީ ތައުރީފު ހައްގުވާ މިންވަަރަށެވެ.
ފިލްމު ބަލަމުން ދިޔަ އިރު މިއީ އަހަރެންނޭ ބުނާނެ ވަކި ޝަހްޝިޔަތެއް އަޅުގަނޑަކަށް ފާހަނގައެއް ނުކުރެވެއެވެ. ނަމަވެސް ފިލުމުގެ ބައެއް ހާލަތްތަށް އަޅުގަނޑާއި ގުޅުވާލެވެއެވެ.
އަޅުގަނޑު ދެކޭގޮތުގައި މިއީ ރާއްޖޭގެ ބޭރުގެ އޯޑިއަންސެއް ހޯދަންޖެހޭވަރުގެ ފިލުމެކެވެ. ބޭރުގެ އޯޓީޓީ ޕްލެޓް ފޯމުން ޖާގަ ހޯދުމުގެ ފުރުޞަތު ހޯދޭވަރުގެ ފެންވަރު ހުރި ފިލުމެއްކަން ޔަޤީނެވެ. އިނގިރޭސިން ޑަބްކޮށް، ސަބްޓައިޓަލް ކޮށްލީމައި ފުރުޞަތު ލިބޭނެ ހެން ހީވެއެވެ. ފްލައިޓުގެ އެންޓަޓޭންމަންޓު ލައިބްރަރީއަށް ވަނުމުގެ ޖާގަ އޭރުން އޮންނާނެއެވެ.
މިފިލުމު ރާއްޖޭން ބޭރަށް ގެންދަން ޖެހޭ އެހެން ސަބަބުތައްވެސް އެބަހުއްޓެވެ. އެއީ ރާއްޖޭގެ ރީތި މަންޒަރުތައް މި ފިލުމުން ފެނިގެން ދާތީ، ޓޫރިޒަމް އިތުރަށް ޕްރޮމޯޓުވުމާއި އެކު ބޭރުގެ ފިލްހަދާ ފަރާތްތަކުން ރާއްޖޭގައި ފިލުމު އުފެއްދުމަށް ސަމާލުކަން ހޯދުމެވެ.
