ތިން އުރަ ސިޓީ

މަރުކަޒެއްގެ ހިންގުން ބަދަލުވެގެން ދިޔައިރު، މަސައްކަތް ހަވާލުކޮށްލުމުގެ ބައްދަލުވުމުގައި، ވަކިވެގެން ދާ ވެރިމީހާ އަލަށް ހަވާލުވާ ވެރިމީހާއަށް 3 ސިޓީއުރަ ހަވާލުކޮށްފައި ވިދާޅުވީ، ކަމެއްދަމެއް ބޮޑުވެގެން މައްސަލައެއް ހުއްލުކުރަން އުނދަގޫވެއްޖެނަމަ ސިޓީ އުރަތަކުގެ ތަރުތީބުން ހުޅުވަމުން ގެންދިއުމަށެވެ.

އަލަށް ހަވާލުވި ވެރިމީހާ މަރުކަޒު ހިންގަމުން ގެންދެއެވެ. ހަވާލުވިތާ ދެތިން މަސްތެރޭ ހިއްސާދާރުންގެ ޝަކުވާ ލިބެންފަށާފިއެވެ. މިޝަކުވާތައް ހައްލުކުރަން ކަންކުރާނެ ގޮތް ބޮޑުވެއްޖެއެވެ. ކުރިން ހަވާލުވެ، ހުރިވެރިމީހާ ހަވާލު ކުރި ސިޓީ އުރަތައް މަތިން ހަދާންވެގެން، އޭގައި އޮތް މަޝްވަރާއެއެް ބަލާލުމަށް އެއްނަންބަރު ޖަހާފައި އޮތް ސިޓީއުރަ ކަނޑާ ބަލާލިއެވެ.

ސިޓީއުރާގައި އޮތީ ކުރިން ހިނގި މީހުން ކަންކަން ކުރި ގޮތުން ދިމާވެގެން އުޅޭ މައްސަލަތަކެއް ކަމުގައި ހާމަކުރުމުން، މައްސަލަ ހައްލުކުރަން ވަޤުތު ލިބޭނެކަމަށެވެ. މިގޮތަށް  ކަންތައް ކޮށްފިއެވެ. ދެން މައްސަލަ ކުރިމަތި ކުރިފަރާތްތައް ކުޑަކޮށް މައިތިރި ވެއްޖެއެވެ.

މަސްތަކަކަށްފަހު އަނެއްކާވެސް ޝަކުވާ ގިނަވެއްޖެއެވެ. އަލަށް ހަވާލުވި ފަރާތުން، ކަންކުރާނެ ގޮތަކާމެދު ފިކުރު ބޮޑު ވެއްޖެއެވެ. އަނެއްކާވެސް ސިޓީއުރަތައްމަތިން ހަދާވެގެން، ދެވަނައަށް އޮތް ސިޓީއުރަ ކަނޑައި ބަލާލައިފިއެވެ. މިސިޓީއުރާގައި އޮތީ ދުނިޔޭގައި މަޝްރަހު ހުރިގޮތުން ދިމާވެގެން އުޅޭކަމެއްކަމުގައި ވިސްނަދިނުމަށެވެ. އޭރުން މަައްސަލަ ހައްލުކުރަން އަނެއްކާވެސް ވަޤުތުކޮޅެއް ލިބޭނެކަމަށެވެ.

މިގޮތަށް ކަންތައްކުރުމުން ޝަކުވާ ކުރުން މަޑުޖެހިއްޖެއެވެ.

ހަވާލުވިތާ އަހަރަކާއި ގާތްވެފައި ވަނިކޮށް، އަނެއްކާވެސް މައްސަލަތައް ކުރިމަތިވާންފަށާފިއެވެ. މިފަހަރު ޝަކުވާތައް ހުރީ ތަންކޮޅެއް ޕްރެޝަރގައެވެ. މިފަހަރު ވެސް މައްސަލަ ހައްލުކުރަން އުނދަގޫވެގެން ހިތަށް އެރީ އެންމެފަހުން އޮތް ސިޓީއުރަމަތިންނެވެ. ތިންވަނަ ސިޓީއުރާގައި އޮތް މަޝްވަރާއެއް ހޯދާލުމަށެވެ.

މިސިޓީއުރާގައި އޮތީ އަހަރެން މިހެދިހެން ތިން އުރަ ސިޓީ ލިޔެފައި އިސްތިއުފާ ދިނުމަށެވެ.

މިއަދު ފެންނަމުން މިދަނީ މިކަހަލަ މަންޒަރުތަކެކެވެ. ކުރިން ކަންތައްކޮށްފައި ހުރިގޮތުން ދިމާވެގެން އުޅޭ މަައްސަލަތަކެއް ކަމަށް ބުނާތަނެވެ. އަސްލު މައްސަލަ ހައްލު ކުރަން ކުރަނީ ކޮންކަމެއްތޯ ކިޔާދޭ މަންޒަރެއް ނުފެނެއެވެ.  

ކުރިން ކަންތައް ކޮށްފައި ތިބި މީހުނެއް މިހާރަކު ނެތެވެ. މިހާރު އޮތްގޮތަކީ ހަވާލުވެތިބި ބަޔަކު އެމައްސަލަ ހައްލުކުރުމެވެ. އެއް ފަހަރު ހަތް ބިލިއަން ރައްޔިރުން ދޭން އެބައޮތޭ ކިޔައެވެ. އަނެއްފަހަރު ނުވަ ބިލިއަނޭ ކިޔާނެއެވެ.

ވެގެން އުޅޭގޮތް ވަރަށް ސާފުކޮށް ކިޔައިދީފައި، ދެން މައްސަލަ ހައްލުކުރުން އުޅުނީމައި އެގޮތް ޤަބޫލުރުން ފަސޭހަވާނެއެވެ. ފައިސޭ ނެތްކަމަށް ބުނާއިރު ފައިސާއިން ކުރެވޭ ކަންކަން ކުރަމުން ގެންދިއާމާ ބަހާއި އަމަލާއި ދިމާ ނުވެއެވެ.

ދެން ކުރިއަށްދުވަސްތަކުގައި ދުނިޔޭގެ މަޝްރަހުގެ ވާހަކަ ދެއްކުން ކައިރިއެވެ. ދުނިޔޭގައި އެއްވެސްކަމެއް އޮތް ހަމައެއްގައި ނޯންނާނެއެވެ. ދުނިޔޭގެ ބޮޑެތި ހުރިހާ ގައުމެއް ކަހަލަގޮތަކަށް، ކޯވިޑުން ސަލާމަތްވެގެން ނިކުންއިރު މިއޮތީ ދަރަނީގައެވެ.

ކޯވިޑްގެ ވަބާ ދުނިޔެއަށް ފެތުރުމާއި އެކު، 2020 ފެށިގެން ދިނިޔޭގެ އިޤުތިޞާދު، ކުރިމަތިލާންޖެހުނީ ބޮޑު އިމްތިހާނެކެވެ. ސަޕްލައި ޗޭން ރޫޅުމާއި ތަކެތީގެ އަގުތަކަށް ބޮޑެތި ބަދަލުތަކެއް އައުމާއި ވަޒީފާގެ ބާޒާރަށް ބަދަލުއައުމާއި ފަތުރުވެރިކަމުގެ އާމްދަނީއަށްވެސް މިވަނީ އަސަރުކޮށްފައެވެ. ވޯލްޑް ބޭންކުން އަނދާޒާކުރާގޮތުގައި 97 މިލިއަން މީހުންގެ ވަޒީފާއަށް ވަނީ އަސަރުކޮށްފައެވެ. އެމީހުންވަނި ފަޤީރުކަން އިހްސާސް ކުރަންޖެހިފައެވެ.

މިއުނދަގޫ ދަނޑިވަޅުގައި އިގްތިޞާދު ހިފޭއްޓުމަށްޓަކައި ގައުމުތަކުގެ ސަރުކާރުންވަނީ ސިއްހީ ކަންކަމަށާއި ވަޒީފާ ގެއްލުނު ފަރާތްތަކަށާއި ކާބޯތަކެއްޗާއި ވިޔަފާރިތަށް ދެމެހެއްޓުމަށް ބޮޑު ހޭދައެއް ކޮށްފައެވެ. މިކަންކަން ސަރުކާރުތަކުން ކުރީ މިފާހަގަކުރި ކަންކަމަށް، މާލީ އެހީތެރިކަން ފޯރުކޮށްދިނުމަށް ލޯނު ނަގައިގެންނެވެ. ގައުމުތަކުން ދަރަނި ނަގަން ޖެހުނީ މަޖުބޫރި ހާލަތަކަށެވެ. މީގެ ނަތިޖާއަކީ، ވޭތުވެދިޔަ 50 އަހަރުގައިވެސް ދަރަނި ނުވާވަރަށް ދުނިޔެ މިއޮތީ ދަރަނިވެފައި ކަމެވެ.

އެންމެ ބޮޑު އިޤުތިޞާދު އެމެރިކާ އޮތީ މީގެކުރިން ދުވަހަކުވެސް ނުވާހައި ބޮޑު ދަރަނީގައެވެ. އެމެރިކާގެ ދަރަނި 33 ޓްރިލިއަނަށް އަރައެވެ. ދުނިޔޭގެ ދަރަނީގެ 50% ހިއްސާ ކުރަނީ އެމެރިކާއާއި ޗައިނާއި ދެގައުމެވެ. ދުނިޔޭގެ ދަރަނީގެ ނިސްބަތުުން އިންޑިއާ ގެ ނިސްބަތަކީ 3.5% އެވެ. މިފަހުން ރާއްޖެ ލޯނު ނެގި ދެ ގައުމުކަމުގައިވާ ޗައިނާއާ އިންޑިއާގެ ދަރަނިވެސް ހަމަ އޮތީ ބޮޑުކޮށެވެ. އެހެންކަމުން މިއިން ގައުމަކުން ނަގާފައި ލޯނެއް އޮންނަ ދުވަހައް ނުދައްކައެއް ނުވާނެއެވެ.

ކަންކަން ދާނީ އަބަދުވެސް ބަދަލުވަމުންެނެވެ. ބަދަލުވަމުން އަންނަ ހާލަތާއި ކަންކަން ވިއްދާގެންތިބެގެން ހައްލެއް ނުހޯދޭނެއެވެ. އަޅުގަނޑުމެން ޖެހޭނީ މަސަކަތްކޮށްގެން ހާލަތު ބަދަލުކުރާށެވެ.

ރާއްޖޭގެ ދަރަނި 160 ބިލިއަން ރުފިޔާއަށް ވީ ސަބަބުތަކެއްވެސް އެބަހުއްޓެވެ. ކޯވިޑުގެ ވަބާއި ކުރިމަތި ނުވިނަމަ ރާއްޖޭގެ ދަރަނީގެ ހާލަތު ތަފާތުވާނެއެވެ. އަދި ރާއްޖެއަށް ކުރިމަތިވާނީ، އެހެން ގޮންޖެހުންތަކެކެވެ.

ރާއްޖޭގެ އުފެއްދުންތެރިކަމާއި ދަރަނީގެ ރޭޝިއޯ އަޅާ ކިޔާ އިރު 2023ގައި ހުރީ 110%ގައެވެ. މި ރޭޝިއޯ 2020ގައި ހުރީ 137% ގައެވެ.  މާނައަކީ އަޅުގަނޑުމެންގެ އުފެއްދުންތެރިކަމަށް ވުރެ ދަރަނި މިއޮތީ މާބޮޑުތަނުން ބޮޑުވެފައިކަމެވެ. އަޅުގަނޑުމެން މި ހިރާސް ދައްކުރެވިފައިވީ ނަމަވެސް، ދުނިޔޭގެ މާލީ އިދާރަތަކުން ކަންބޮޑުވުން ފާޅު ކުރަނީ މިރޭޝިއޯ މިންގަޑަށްވުރެ މަތިކަމުންނެވެ. އެއީ ދަރަނި ނުދެއްކިދާނެކަމުގެ ހިރާސް އޮތް ކަމަށް ފެންނާތީއެވެ.

މިހާރު އޮތްގޮތަކީ ދަރިނި ފިލުވަން މަސައްކަތް ކުރާނެ ފޯމިއުލާއެއް މަގުޗާޓެއް އޮތުމެވެ. ދަރަންޏާއި ގުޅިފައި ހުރި ބައިވަރު ކަންތައްތަކެއް ހުންނާނެއެވެ. ބޭރު ފައިސާގެ އަގު، އިންޓަރެސްޓް ރޭޓު، އަދި ތަކެތީގެ އަގު ފަދަ ކަންކަން ހައްލުވާނީ ޕްރޮޖެޓު ހިނގާގެނެއް ނޫނެވެ. އާންމު ފަރުދުންނަށް ކޮންމެދުވަހަކު، ދިމާވާ މިދެންނެވި ގޮންޖެހުންތައް ހައްލުކޮށްދެވޭނެ ގޮތެއް ހޯދައިދިގެންނެވެ.

ނޫނީ ތިންވަނަ ސިޓީ އުރާގައި އޮތް ގޮތްވެސް އިހްތިޔާރު ކުރެވިދާނެއެވެ.