އިންފުލޭޝަން ހުރީ ވަރަށް ދަށުގައި ކާބޯތަކެތީގެ އަގުދަށެއް ނުވޭ.

އަޅުގަނޑު ދުވަސް އޮންލައިންގައި " ކާބޯތަކެތީގެ އަސާސީ ބާވަތްތަކުގެ އަގު ކުޑަކުރުމާ ގުޅޭ ގޮތުން މުހިންމު ނިންމެވުންތަކެއް ނިންމަވައިފި"  މިސުރުހީގެ ދަށުން 29 ޖެނުއަރީގައި ލިޔެފައިވާ ޚަބަރު ބަލާލީމެވެ. ކިޔާލީމެވެ.

އެ ޚަބަރުގައި އޮތީ ކާބޯތަކެތި އަގު ކުޑަކުރުމަށް ރައީސުލު ޖުމްހުރިއްޔާ ސިޔާސަތު ތަކެއް ކަނޑައަޅުއްވަން ކަރުދާސްތަކެއް ތައްޔާރު ކުރާކަމާއި އަދި މައިގަޑުގޮތެއްގައި ސަރުކާރުން ކުރައްވަން ގަސްދުކުރައްވާ ކަންތައްތަކުގެ ހުލާސާއެކެވެ.

މިގޮތުން ޔުޓިލިޓީ ކުންފުނިތަކުން ތެލުގެ ހަކަތަ އުފައްދާ މިންވަރު ކުޑަކުރުމަށް ޕުލޭނެއް އެކުލަވާލާކަމަށެވެ. އަދި ދިވެހިރާއްޖޭގެ އެކި ކަންކޮޅުތަކުގައި ގުދަންކުރުމުގެ ކެޕޭސިޓީ އިތުރުކޮށް ޒަމާނީ ގުދަންތަކާއި ކޯލްޑް ސްޓޯރޭޖްތައް ޤާއިމުކުރާނެ ސަރަހައްދުތަކެއް، ކަންޑައަޅުއްވާނެކަމަށެވެ.

މީގެ އިތުރުންވެސް ރާއްޖޭގައި ޤާއިމުކޮށްފައިވާ ވިޔަފާރި ބަނދަރުތަކުން ނަގަމުންދާ ފީ މުރާޖާކުރައްވާނެކަށެވެ.

އަޅުގަނޑު ހިތުން މިއުޅުއްވަނީ ޤައުމުގެ އިންފުލޭޝަން ކުޑަކުރައްވާނެ ގޮތްތަކެއް ހޯދައްވާންށެވެ. އާންމުކޮށް އިންފުލޭޝަންއަށް މިކިޔާނީ ވަކި މުއްދަތެއްގެ ތެރޭގައި ހިދުމަތާއި މުދަލުގެ އަގަށް އަންނަ ބަދަލެވެ. އެހެން ގޮތަކަށް ބުނަނީނަމަ ރުފިޔާއަށް ގަނެވޭ މުދަލާއި ހޯދޭ ހިދުމަަތް ދަށްވުމެވެ. ކުރިއަށްްވުރެ ހަރަދުބޮޑުވުމެވެ. މިދިޔައަހަރު ނިމުނު އިރު ގައުމުގެ އިންފްލޭޝަން ހުރީ 3.4 ގައެވެ.

އެހެންވީމައި އަޅުގަނޑުމެންގެ ދިރިއުޅުމުގެ ހަރަދުތައް 3.4 ބޮޑުވީއެވެ. އަޅުގަނޑުމެން ގަންނަތަކެތީގެ އަގު މިހާރު ހުންނާނީ 3.4% ބޮޑުކޮށެވެ. އަޅުގަނޑުމެން އަލަމާރީގައާ ބޭންކުގައި ހުރިފައިސާ މިހާރު އެހެރީ 3.4% އަގުވެއްޓިފައެވެ. އަޅުގަނޑުމެންގެ ފަސްމަގުގައި މިއަށްވުރެ އިންފްލާޝަން ބޮޑުކޮށް ދިޔަ ދުވަސް ތައްވެސް ހިނގައްޖެއެވެ.

އިންފުލޭޝަން މިހާވަރުގައި ހުރުމަކީ ކަންބޮޑުވާންޖެހޭކަމެއް ކަމަކަށް ނުވެދާނެއެވެ. މިދިޔަ އަހަރު ނިމުނު އިރު، ނޮވެންބަރ އަދި ޑިސެންބަރގެ އިންފުލޭޝަން ހުރީ 2 އަދި 2.1 ގައެވެ. މިވަރުގައި އިންފްލޭޝަން ހުއްޓާ ކީއްކުރަންތޯ ސަރުކާރުން އަދިވެސް އިންފުލޭޝަން ތިރިކުރައްވަން މަސައްކަތް ކުރައްވަނީ؟

ސަބަބެއްކަމަށް އަޅުގަނޑަށް ލަފާކުރެވެނީ އެމްއެމްއޭއިން ޝައިއުކުރާ ރިޕޯޓުގައި އިންފުލޭޝަން ހިސާބު ތައްޔާރުކުރާއިރު ކާބޯތަކެތީގެ އަގުތައް ރަނގަޅަށް ހިމަނާފައި ނުހުރެއެވެ. އެހެންކަމުން އަޅުގަނޑު މިފާހަގަކޮށްފައިވާ ހިސާބު ތަކަކީ އާންމު ދިރިއުޅުމާއި ގުޅުން ހުރި ނަންބަރުތަކެއް ކަމުގައި ނުވާނެއެވެ. އަޅުގަނޑުމެންގެ އިންފުލޭޝަން އުޅޭނީ މިއަށްވެރެ ބޮޑުކޮށެވެ.

ކީބޯތަކެތީގެ އަގުތަކަށް ބަދަލެއް ނާދެއެވެ. ދަނީ މައްޗަށެވެ. އެކަމު އިންފުލޭ ހުރީ ވަރަށް ތިރީގައެވެ. މިއީ އަޖާބުވާންޖެހޭކަމެކެވެ.

ސަރުކާރުން ކުރައްވަން މިއުޅުއްވާ އެއްވެސް ކަމަކުން މިވަޤުތު އިންފުލޭޝަން ކުޑައެއް ނުވާނެއެވެ. އެހެންވީމާ ރޯދަމަހުގައި ކާބޯތަކެތީގެ އަގުތައް ކުޑަވެދާނެކަމަށް ނުބެލެވެއެވެ. އެއްވެސް ރޯދަމަހެއްގައި ކާބޯތަކެތީގެ އަގު ކުޑަނޫންކަމަށް އަޅުގަނޑުވެސް ޤަބޫލު ކުރަމެވެ. އެވަރަށްވެސް އަގުތަށް ހިފޭއްޓެނީ އެއިރެއްގައި އޮންނަ ސަރުކާރަކުން އަގުތައް ކޮންޓުރޯލުކުރަމަށް ވަރަށް މަސައްކަތް ކޮށްގެންނެވެ.

ސަރުކާރުން ކުރައްވަން މިއުޅުއްވާ މަސައްކަތްތަކުން މިވަޤުތަށް ވާނީ ހަރަދު ބޮޑެވެ. ސަރުކާރުގެ ހިންގުމުގެ ހަރަދު ބޮޑުވީވަރަކަށް އިންފުލޭޝަން ދާނީ މައްޗަށެވެ.

ސަރުކާރުން ކުރެވިދާނެ ބައެއް ކަންކަން އެބަހުއްޓެވެ. ސަރުކާރުގެ ހިންގުމުގެ ހަރަދު ކުޑަކުރެވިދާނެއެވެ. ސަރުކާރުގެ މުއައްސަސާތަކަށް ދޭ ބެޖެޓު ކުޑަކުރުން، ޓެކްސްތައް ބޮޑުކުރުން - އާންމުން ކުރާ ހަރަދު ކުރުން މަޑުޖެހޭނެއެވެ.

އަޅުގަނޑުމެން އެންމެ ބޮޑު ހަރަދެއް ކުރަނީ ތެލަށެވެ. ދުނިޔޭގައި ތެލުގެ އަގު ކުޑަވަމުން އަންނަތަނެއް ނުފެނެއެވެ. ރަޝިއާއިން ތެޔޮ ލިބޭނެ ގޮތެއް ހޯދަންވީއެވެ. އޭރުން މިހާރަށްވުރެ ޙަރަދު ކުޑަވުން އެކަށީގެންވެއެވެ. އަދި އޭރުން ބޭރުފައިސާގެ ރިޒާވްއަށްވެސް ހެޔޮބަދަލެއް އަންނާނެއެވެ.

މިވަޤުތަށް މުސާރަތަށް ބޮޑު ނުކުރަން ވީއެވެ. ސަރުކާރުގެ ވަޒީފާތަށް އިތުރު ނުކުރަންވީއެވެ. ޑޮލަރުގެ މާރކެޓަށް ހައްލެއް ހޯދަން ސަރުކާރު މަސައްކަތްކުރައްވާ ވާހަކަ ޚަބަރުން އަޅުގަނޑު އަޑުއެހީމެވެ. ކުރައްވާނީ ކޮންކަމެއް ކަމެއް ވިދާޅެއްނުވެއެވެ. ޑޮލަރަށްވެގެން އުޅޭގޮތާއި އަދި ހައްލުވެސް އަޅުގަނޑުމެން އެންމެނަށް އިގެއެވެ.

އަޅުގަނޑުމެން ކާބޯތަކެތީގެ ގިނަ ތަކެތި ގެންނަނީ ބޭރުންނެވެ. އެހެންވީމާ ކަޅު ބާޒާރުގައި ޑޮލަރުގެ އަގު މައްޗަށް ދިޔަވަރަށް ރުފިޔާ މިދަނީ ވެއްޓެމުންނެވެ. އަޅުގަނޑުމެން ބޭރުން އެތެރެކުރާ ތަކެތި އަގުދާނީ މައްޗަކަށް ނޫންތޯއެވެ.