EN
މިއަދު ހެނދުނު އެކުވެނި ޓްރެކުގައި ކަސްރަތުގެ ތެރެއިން ވަރުބަލި ފިލުވާލުމަށް އަޅުގަނޑު ދުވެލި މަޑުކޮށްލި ވަޤުތަކީ، ވަރޭ ކަނި ޖަހަންވެސް ފެށި ވަޤުތެކެވެ. އޭރު އަޅުގަނޑު އަރާ ހަމަވީ ދުވަސްވީ ދެބޭފުޅާކާއެވެ.
ވާރޭވެހޭތީވެ، އެއްބޭފުޅަކުު ވިދާޅުވީ އަވަހަށް ހިޔާވާން ތަނަށް ވަންނަމާހެއެވެ. އަޅުނޑު އެވާހަކަތެރެއަށް ވަދެ އެބޭފުޅުންނަށް ހިޔާވާނެ ތަނެއް ދައްކާލައިފިމެވެ. އެތަނުގައި ގޮޑިވެސް ހުންނާކަމާއި ރަނގަޅަށް ހިޔާވާނެ ކަމަށް ދެންނެވީމެވެ.
އެބޭފުޅުން އެކަން ޤަބޫލު ކުރައްވާ އެތަނަށް މިސްރާބު ޖަހަމުން އެއްބޭފުޅަކު ވިދާޅުވީ، މަރުހޫމު ޝިހާބު ވިދާޅު ވިއޭ، ވާރޭ ކަނި ޖާހާއިރުއޭ ނިދާލަން ފަސޭހައީ، އަޅުގަނޑު ދެންނެވިން ތީ ވަރަށް ބޮޑު ތެދެކެވެ. އެއީ ނިންޖާބެހޭގޮތުން އަޅުގަނޑު ކިޔާލެވުނު ފޮތެއްގައި އޮންނަނީ ކޮޓަރި ތެރެ އުނދަގޫ ނުވާވަރަށް ފިނިކޮށް ބަހައްޓައިގެން ނިދުމަށް ފަސޭހަވާނެކަމަށެވެ. އަދި މިއީ އަޅުގަނޑުވެސް ތަޖުރިބާ ކުރާކަމަކަށްވާތީ އެކަމަށް ބަހުސެއް ނެތި އެއްބަސްވެލީމެވެ.
އެބޭފުޅާ ވިދާޅުވި މަރުހޫމް އިބްރާހިމް ޝީހާބަކީ ވަރަށް މޮޅު ބޭފުޅެއްކަމަށެވެ. އަޅުގަނޑު ދެންނެވިން އަޅުގަނޑު އަޑުއަހަމޭ މަޒުމޫނު ހޯދުމަށް އަރިހަށް ވަޑައިގަންނަވާ ބޭފުޅުންކައިރިން މައުޞޫލާ އާއި ދިގުމިނުގެ ވާހަކަ އައްސަވާ، ދެން މަޒުމޫނު ވިދާޅުވެ ދެއްވަން ފައްޓަވާކަމަށެވެ. ދެން ވަޑައިގެންނަވާ ބޭފުޅުން ލިޔުއްވަމުން ގެންދަވަންވީ ކަމަށެވެ. މަޒުމޫނުގައި ކަނޑައެޅިފައި އޮތް، ދިގުމިނަކަށް ބަރާބަރަށް ނިންމަވާލައްވާކަމަށެވެ.
އަޅުގަނޑަށް މިދެންނެވުނީ ރަނގަޅު ވާހަކައެއް ކަމަށް އަޅުގަނޑާއި އެކު ހުރި ދުވަސްވީ ބޭފުޅާގެ އިޝާރާތުން އެއްބަސްވެލެއްވެވިއެވެ. ދެން އެބޭފުޅާ ވިދާޅުވެ ދެއްވީ އަލިބެ ކިޔާބޭފުޅެއް (އާއިލާއީ ނަމުގެ ކުރިއަށް ކިޔާނަންވެސް ވިދާޅުވި) ޝިހާބުއާއި މައްލަވަކުރުމުގެ ނިޔަތުގައި ފައިންޕުޅު ދެކެލަންވަޑައިގެން ކަމަށެވެ.
ޝިހާބު އަރިހުގައި ދެންނެވިއޭ ޝިހާބުއަކީ އެކި ފަހަރު އެކިގޮތަށް ވާހަކަ ދައްކަވާ ބޭފުޅެއްކަމަށެވެ. ރައީސް މުހައްމަދު އަމީން އަކީ އަމާނާތްތެރިއެއް ކަމަށް އެއްފަހަރު ވިދާޅުވާނެއެވެ. އަނެއްފަހަރު ވިދާޅުވާނެ ރައީސް އަމީންއަކީ ހާއިނެއްކަމަށެވެ.
ޝިހާބު ވިދާޅުވިއޭ، އަލިހޮއްކޮއޭ - ކުރިން ބުނިވާހަކައަކީ އަޅުގަނޑު ދެކޭގޮތެވެ. ފަހުން އެބުނި ވާހަކައަކީ ޤައުމުގެ ދުލެވެ.
މިވާހަކައިން އަޅުގަނޑަށް ދެނެގަނެވެނީ، ސިޔާސީ ބޭފުޅުން އަމިއްލަފުޅަށް ކަންމުގައި ދެކޭގޮތާއި ގައުމުގައި އެވަޤުތަކު ދެމޭ އޮއެވަރުގައި ޖެހި ޖަޒުބާތުގައި ވިދާޅުވާބަސްފުޅު ތަފާތުވާކަމެވެ.
ޖަޒުބާތުގައި ނުނީ ވަކި މަޤްޞަދެގައި އަޑުއުފުލާ ބައެއްގެ ތެރޭގައި އެންމެ އިސްކޮށް އަދި އެންމެ ކުރީގައި ހުރުމަކީ ކޮންމެ މީހަކަށްވެސް ކުރެވިދާނެކަމެކެވެ.
އަޅުގަނޑު ދެކޭގޮތުގައި ހަޤީޤީ ލީޑަރުންނަކީ އެބައެއްގެ ތެރޭގައި ހުރެ ތިމާ ދޭކޭގޮތްް ބަދަލުނުކޮށް އަނެކުންނަށް ރަނގަޅުގޮތް ވިސްނާދޭ މީހާއެވެ.
ޕާރޓީއެއްގައި ނުވަތަ މުއައްސަސާއެއްގައި މަސައްކަތް ކުރަން ފަށާގަންނައިރު، އެތަނުގައި ތިބި އެންމެނާއި އެއްގޮތަށް ތިމާ ބަދަލުވީމާއި ކޮބާތޯ އަމިއްލަ ވަންތަކަމަކީ؟ ކޮބާތޯ އިސްނެގުމަކީ؟ ކޮބާތޯ ތިމާ އެތަނަކަށް ގެނެސްދޭނެ ތަޖުރިބާއަކީ؟ އެތަނުގައި މަސައްކަތްކުރަން ތިބި ބަޔަކަށް އިތުރަށް ދަސްވާނެ އެއްޗަކީ ކޮބައިތޯ؟
ތާރީހުން މިސާލެއް ލިޔެލެވޭތޯ ބަލާނަމެވެ. ގެންގިސް ހާން މޮންގޯލިއާއިން ނިކުމެ ދުނިޔޭގެ އެކިހިސާބުތައް ފަތަހަ ކުރުމަށް ފެށި ދަތުރުގައި އަރަބި އިސްލާމީ ދައުލަތްތަކާއި ހަމައަށް ފޯރިއެވެ. އިސްލާމީ ގައުމުތަކުގައި ގެންގިސް ހާންގެ ވެރިކަންތަައް ގާއިމު ކުރިއެވެ.
މިވެރިކަންތަކުގެ އެއްވެސް ވަހެއް މިއަދަކު އިސްލާމީ ދައުލަތްތަކުން ފެންނާކަށް ނެތެވެ. ސަބަބަކީ މުސްލިމުންނާއި ހަމައަށް މޯންގޮލިއަނުން ފޯރުމުން އެމީހުން އިސްލާމުންނަށް ބަދަލުވީއެވެ. މޯންގޯލިއަނުން އަރަބި ދުނިޔޭގައި ކުރީ އިސްލާމީވެރިކަމެވެ. އެމީހުން މުސްލިމުންނަށް ވީއެވެ. އެއީ އިސްލާމުދީނަކީ އެންމެ ރަނގަޅު ދީންވެސްކަމަށް ވާތީއެވެ.
އަޅުގަނޑުމެންގެ މަސައްކަތުގެ މާހައުލުގައި އާއި ސިޔާސީ މައިދާން މިހިނގަނީ މިގޮތަށެވެ. ލީޑަރޝިޕް ދެއްކުމަށް ވުރެ ބޮޑަށް ފެންނަނީ ޖަޒުބާތުގެ އަވާގައި ޖެހިގެން ދީލާލާފައިވާ މަންޒަރެވެ.
ސިޔާސީ ޕާރޓީތަކުގެ ސިޔާސަތާއި އުސޫލުތައް ހުރީ ވަރަށް އެއްގޮތަކަށެވެ. ވެރިކަން ކުރި ކޮންމެ ޕާރޓީއެއްވެސް އުޅެނީ ބަޖެޓުން ދެކޮޅު ނުޖެހި ސަރުކާރު ހިނގަން އުނދަގޫވެގެންނެވެ. އުމްރާނީ ތަރައްޤީގެ މަޝްރޫއުތައް ހިންގުމުގެ ވާދަވެރިކަމެއްގައެވެ. ކުރީ ސަރުކާރަށްވުރެ އަހަރެމެން ސަރުކާރު ހިނގި ޕްރޮޖެކްޓު ގިނަކުރުމަކީ ކޮންމެހެން ކުރަންޖެހޭކަމެކެވެ.
އެހެންވީމައި ކަންނޭގެ، ޕާރޓި ބަދަލުކުރުމަކީ، އެމީހެއް ހާޞިލު ކުރަން ބޭނުން ލަނޑުދަނޑިއާއި ހަމައަށް ފޯރުމަށް އޮތް ހުރަހަކަށް ނުވެއެވެ. ރައީސް ޔާމިން ވެރިކަމަށް ވަޑައިގަތީ ތިންވަނަ ޕާރޓީގައި ހަރަކާތްތެރިވެފައެވެ. އިންތިހާބީ ރައީސްގެ މިއީ ހަތަރުވަނަ ޕާރޓީއެވެ. ރައީސްކަން ކުރައްވާފައި ތިއްބެވި ބޭފުޅުންވެސް ހަމަ އެފަދައެވެ. އެންމެ ހީނުކުރާ ބޭފުޅާ، ރައީސް ނަޝީދުވެސް ވަނީ އަލަށް ޕާރޓީއެއް އުފައްދަވާފައެވެ. ރައީސް މައުމޫނު މިހާރު އެހުންނެވީ ތިންވަނަ ޕާރޓީ އުފައްދަވައިގެންނެވެ.
މިބޭފުޅުން ޤަބޫލުކުރައްވާ ފިކުރާއި ސިޔާސަތަށް ބަދަލެއް ނާންނަކަމަށް ވެދާނެއެވެ. މަރުހޫމް ޝިހާބުގެ ބަސްފުޅައް ރިޔާއަށް ދަންނަވަންޖެހޭނީ ޕާރޓީ ބަދަލުކުރުމަކީ އެހިނދު ގައުމުގެ ދުލުން އެދޭގޮތްކަމަށް ވެދާނެކަމަށެވެ.
ސިޔާގޮތުން ގެންގުޅޭ ހަމައެއް އޮވެއެވެ. ސިޔާސިގޮތުން ދާއިމީ އެކުވެރިންނެއް އަދި ހަތުރުންނެއްވެސް ނުތިބޭނެއެވެ. އަޅުގަނޑުމެންގެ ސިޔާސީ މަޝްރަހަށް ނަޒަރު ހިންގާލައްވާށެވެ. ފެންނާނީ އެއްމަންޒަރެކެވެ. މަރުހޫމު ޝިހާބުގެވެސް ސިޔާސީ ހަޔާތްޕުޅުގައި ކަންކުރައްވާފައި އޮތީ މިހެންކަމަށް ވެދާނެ ނޫންތޯއެވެ.
