EN
ދުނިޔެއަށް އުފަންވީއްސުރެ ޒަވާޖީ ޙަޔާތެއް ފެއްޓުމާއި ކިޔެވުމަށް ރާއްޖޭން ބޭރަށް ދިއުމާއި ހަމައަށް ޢަލީ ޚާލިދު ދިރިއުޅެމުން ގެންދިޔައީ މާފަންނު ސަހަރާކުރިމަތީ ހުންނަ ޢަލީގެ ބައްޕަގެ ގެ މ.ފިނިފަރު ގައެވެ.
ސުކޫލު ދައުރު ނިމުމަށްފަހު ވަޒީފާ ހޯދީ މިހާރު މިފްކޯގެ ދަށުން ހިންގާ ފެލިވަރު ދަޅުމަސް ބަނދުކުރާ ކާރުހާއިންނެވެ. ވަޒީފާ ފެއްޓީ އުމުރުން އެންމެ 17 އަހަރުގައި މެނޭޖްމަންޓްގެ މަގާމުތައް ފުރަތަމަ ފެއްޓޭ ހިސާބުންނެވެ. މިފްކޯގައި ހޭދަކުރި ދުވަސްތަކުގައި ޢަލީ ވަނީ އެކި ޑިޕާރޓްމަންޓްތަކުގައި ވަޒީފާ އަދާކޮށްފައެވެ. މިފްކޯއިން ވަކިވިއިރު އަލީ ހުރީ ކުންފުނީގެ ސޭލްސް އެންޑް މާރކެޓިން ޑިޕާރޓްމަނޓް ހިންގުމާއި ހަވާލުވެއެވެ. މިފްކޯގައި ހޭދަކުރި ގިނައަހަރުތަކުގައި ޢަލީ ވަނީކުންފުންޏަށް ފައިދާ ހޯދުމަށް ގިނަ މަސައްކަތްތަކެއްކޮށްފައެވެ. މީގެ ތެރޭގައި ފިނިކުރި ކަންނެލީ ގެ ޔީލްޑު އިތުރުކުރުމާއި، މަހުގެ އެކި އުފެއްދުންތައް ރާއްޖޭގެ މާރކެޓްއަށް ތަޢާރަފުކުރުން ހިމެނެއެވެ. ދެހާހުގެ ކުރީކޮޅު ފެލިވަރަށް ލިބެމުންދިޔަ ގެއްލުން ބަދަލުކޮށްލީ ޢަލީގެވެސް ވިސްނުމުގެ އަލީގައެވެ. އަދި ކުންފުނީގެ އުފެއްދުންތައް މާކެޓްކުރެވޭ ޒަމާނީ ވިސްނުން ތައާރަފުވެގެން ދިޔައީވެސް މިދުވަސްވަރުއެވެ.
ރާއްޖގެ މުއާޞަލާތީ ދާއިރާ ވާދަވެރިކަމަށް ހުޅުވާލުމާއި ގުޅިގެން އަލަށް މާރކެޓްއަށް ނުކުތް ވަތަނިއްޔާގެ ސްލޭސް ޑިޕާރޓްމަންޓް ގާއިމުކުރުމުގައި އެންމެ އިސްކޮށް ހަރަކާތްތެރިވީ އަލީއެވެ. މުޅިރާއްޖޭގައި ވަތަނިއްޔާގެ ޚިދުމަތް ރައްޔިތުންނާ ހަމައަށް ލިބޭނެ މަގު ފަހިކުރުމަށް ހަމަކޮންމެ ފިހާރައަކުން ވަތަނިޔާ ޕެކޭޖްތައް ލިބޭނެ އިންތިޒާމް ހަމަޖެއްސުމުގެ ކަންކަން ރާވާ ހިންގީ އަލީއެވެ.
ދެހާހުގެ މެދުތެރޭ ނޫސްވެރިކަމުގެ މިނިވަންކަމަށް ރާއްޖެ ގޮވަމުން ދިޔަ ދުވަސްވަރު، ޢަލީއަށް ވަނީ ޓީވީއެމް ހިންގުމުގައި އެންމެ އިސްކޮށް ހަރަކާތްތެރިވުމުގެ ފުރުޞަތު ލިބިފައެވެ. 2008ގައި ބޭއްވުނު ފުރަތަމަ ޑިމޮކްރެޓިކް އިންތިޚާބަށް ޓީވީއެމް ތައްޔާރުކުރީ ޢަލީގެ ރޭވުންތެރިކަމާއެކުއެވެ.
އަދި މީޑިއާގެ ދާއިރާ ހުޅުވާލުމާއި ގުޅިގެން ޓީވީއެމް ވާދަވެރި މާޙައުލުގައި މަސައްކަތް ކުރުމުގެ ވިސްނުން އެމުއައްސަސާ ތެރޭގައި އުފައްދާ، އެމަގަށް މަސައްކަތްކުރެވޭނެ އިންތިޒާމް ޢަލީ ހަމަޖެއްސިއެވެ.
އަލީ ވަނީ ރައީސުލްޖުމްހޫރިއްޔާގެ އޮފީހުގެ ޗީފް ކޮމިއުނިކޭންސް އޮފިސަރުގެ ގޮތުގައި ދޮޅު އަހަރެއްހާދުވަހު މަސައްކަތްކޮށްދީއްވާފައެވެ.
ލިޔުންތެރިކަމާ، މީޑިއާގައި ޢަލީ ހަރަކާތްތެރި ވަމުން އަންނަތާ މިހާރު ދިހަވަރަކަށް އަހަރުވީއިރު ވިޔަފާރީގެ ދައިރާގައިވެސް އަލީ ހަރަކާތެރިވެއެވެ. އަމިއްލަ ވިޔަފާރީގައި ޢަލީ ޙަރަކާތްތެރިވާތާ ހަމަ އެހާ ދުވަސް ވެއްޖެއެވެ.
އަލަށް ވަޒީފާގެ މާހައުލަށް ނުކުންނަ ފަރާތްތަކަށް އެހީތެރިވުމަށް "ވަޒީފާއަށް ނުކުންނައިރު" ގެ ނަމުގައި ޢަލީ ވަނީ ފޮތެއް ނެރެފައެވެ.
ފޮތްކިއުމާ ކަސްރަތުކުރުމާއި، ދިގުދުވުންދުވުމާއި، ލިޔުންތެރިކަމަކީ ޢަލީ އެންމެ ޝައުގުވެރިކަމާއެކު ކުރާ ކަންކަމެވެ.
ޢަލީ ތަޢުލީމް ޙާޞިލުކޮށްފައިވަނީ އޮސްޓްރޭލިއާއި މެލޭޝިއާއިންނެވެ. މަތީ ތައުލީމް ޙާސިލުކުރީ ބިޒްނަސް އެޑްމިނިސްޓްރޭޝަންގެ ދާއިރާއިންނެވެ.
ފަސްބޭން ގެ އާއިލާއެއްގައި ޢަލީއަކި ހަތަރުވަނަ މެންބަރެވެ. އަލީ ދިރިއުޅެނީ އަންހެނުން ތަސްނީމާއި ދަރިފުޅު މަނާފާއި އެކުއެވެ.